Thursday, August 22

Benki ya KCB Tanzania yaandaa Futari kwa wateja wake wa Dar es Salaam

0


Benki ya KCB Tanzania leo jioni imeandaa Futari kwa ajili ya wateja wake katika Hoteli ya Serena jijini Dar es Salaam, ikihudhuriwa pia na wajumbe wa bodi pamoja na wafanyakazi wa Benki.


Akiongea kwenye tukio hilo, Mwenyekiti wa Bodi wa Benki ya KCB Tanzania, Zuhura Muro, amesema benki imeamua kuandaa futari hiyo ili kujumuika na wateja wake kama hatua ya kuonyesha mshikamano na umoja katika kipindi cha mwezi mtukufu wa Ramadhani.


“Hapa Benki ya KCB, tunathamini na kutaambua wajibu wetu katika jamii hususani katika nyanja za elimu, mazingira na ujasiriamali.” Amesema Muro huku akiongeza kuwa benki imekuwa ikiwekeza katika masuala ya kijamii tangu ilipofungua milango yake nchini Tanzania mnamo mwaka 1997.


Amesema pia kuwa benki inaheshimu sana Mwezi Mtukufu wa Ramadhani kutokana na ukweli kwamba, ni kipindi ambacho mwanadamu anajiweka karibu na Muumba kupitia sheria ya kufunga na kufanya maombi.


“Mwezi mtukufu wa Ramadhani ni ukumbusho kwetu wote kujiweka karibu na Muumba wetu. Ni mwezi ambao pia unatukumbusha kufanya kilicho chema mbele za Mungu wetu. Ndiyo maana hapa KCB tumeamua kuandaa futari hii ili kujumuika na wenzetu.” Amesema Muro.


Muro pia ameongeza kuwa benki ina idara maalum inayojikita katika kutoa huduma kwa wateja wake wa imani ya Kiislam, idara inayojulikana kama “Sahl Banking” inayopatikana kwenye matawi yote ya KCB.


Muro ameongeza kuwa KCB ina jumla ya matawi 14 nchi nzima na ni taasisi ya kwanza ya kifedha nchini Tanzania kuanzisha Shariah Banking kwa ajili ya kuwahudumia wateja wake wa Kiisalam.


“Benki ya KCB imekuwa ikijidhatiti katika kuboresha huduma kulingana na mapendekezo mbalimbali ya wateja”. Kimario amesema huku akitolea mfano Shariah Banking ambayo inafuata muongozo wa Imani ya Kiislam katika nyanja ya kifedha.


Muro amewaomba wale ambao hawajajiunga na Benki ya KCB kufungua akaunti zao ili waweze kufurahia huduma bora na za kipekee zinazotolewa katika matawi yote ya KCB nchini.


Benki ya KCB Tanzania imekuwa ikiandaa futari za aina hii kila unapofika mwezi mtukufu wa Ramadhani kama hatua ya kuungana na jumuiya ya waislam wote nchini katika kutimiza funga zao.

Share.

About Author

Leave A Reply