Friday, July 19

Butiku aitaka VETA kutumia karakana zake kuzalisha bidhaa, kuchonga vipuli

0


Mkurugenzi Mtendaji wa Taasisi ya Mwalimu Nyerere, Joseph Butiku ameitaka Mamlaka ya Elimu na Mafunzo ya Ufundi Stadi (VETA) kutumia vifaa vilivyopo katika karakana zake kuchonga vipuli na kuzalisha bidhaa mbalimbali kwa mahitaji mbalimbali nchini.

Butiku alitoa ushauri huo wakati wa mahafali ya chuo cha VETA Dar es Salaam yaliyofanyika Novemba 23, 2018.

Alisema baada ya kutembea kwenye karakana mbalimbali na kuhojiana na walimu na wanafunzi, amebaini kuwa VETA ina rasilimali na hazina kubwa ya mashine na ujuzi wa walimu na wanafunzi ambao ukitumiwa vyema unaweza kuzalisha vitu vingi ambavyo kwa kiasi kikubwa bado vinafanywa na watu binafsi au kununuliwa kutoka nje ya nchi.

“nimejionea vifaa vingi ambavyo naamini vikitumika vizuri vinaweza kuleta manufaa makubwa sana kwa taifa, ifike mahali sasa vifaa mlivyonavyo katika karakana zenu viweze kutengeneza mashine nyingine kwa ajili ya matumizi mbalimbali ” Alisema

Alitoa mfano wa karakana ya uchapaji ambayo alisema ikiimarishwa inaweza kufanya shughuli nyingi sana za uchapaji wa vitu mbalimbali kwa kuwa ina vifaa na wataalam muhimu vya kuweza kufanya shughuli hizo kwa ufanisi mkubwa.

Sambamba na hilo, aliishauri VETA kuanzisha masomo ya sanaa kama vile nyimbo na ngoma za asili kwa kuwa sanaa hizo kwa sasa ni ajira kwa vijana na zikiwekewa utaratibu mzuri zitakuwa na manufaa makubwa kwa nchi huku akiwaasa wahitimu kutumia vyema ujuzi walioupata kujitengeneza ajira zao wenyewe kupitia vikundi.

Mkurugenzi Mkuu wa VETA Dkt Pancras Bujulu alisema mamlaka hiyo inaendelea na juhudi mbalimbali za kuhakikisha inazalisha mafundi stadi mahiri watakaoweza kukidhi mahitaji ya soko la ajira na kushiriki kikamilifu katika miradi mbalimbali inayotekelezwa na serikali ikiwa ni pamoja na mwelekeo kwenye uchumi wa viwanda.

Alivitaka vyuo vya ufundi stadi kuweka nguvu katika kuendeleza vipaji vya vijana kwa kuwa vijana wengi wanaosoma katika vyuo hivyo wana vipaji ambavyo vikiendelezwa vinaweza kuwanufaisha na kuendelea.

Dkt. Bujulu alitumia fursa hiyo pia kuwatangazia na kuwataka wahitimu, wanafunzi na walimu wenye ubunifu kushiriki kwenye mashindano ya kitaifa ya sayansi, teknolojia na ubunifu yaliyozinduliwa Novemba 14, yakiwa na lengo la  kuibua vipaji na kuhamasisha uendelezaji wa teknolojia na ubunifu  utakaoweza kuchangia kwa kiasi kikubwa katika maendeleo endelevu ya viwanda, kuongeza tija ya uzalishaji wa malighafi, kuongeza thamani ya bidhaa zinazozalishwa nchini pamoja na kuboresha shughuli nyingine za kiuchumi.

Aliwasihi wafanyakazi wa VETA kutumia utaalam walionao kutatua changamoto mbalimbali zilizopo katika vyuo kwa kutumia rasilimali zilizopo na kuongeza kuwa VETA itaendelea na jitihada za kuhakikisha elimu na mafunzo ya ufundi stadi inawafikia wananchi wengi zaidi ili watanzania wengi wanufaike nayo .

Awali, Kaimu Mkuu wa Chuo cha VETA Dar es Salaam Violeth Fumbo alisema jumla ya vijana 536 wamehitimu ambapo 523 wamehitimu ngazi  za ufundi stadi daraja la pili katika fani 20 za ufundi na 13 wamehitimu Diploma ya Ubunifu wa nguo na mitindo ya mavazi.

Alisema pamoja na wahitimu hao wa kozi za muda mrefu, chuo hicho kimeendelea kuboresha huduma zake ikiwa ni pamoja na kutoa mafunzo ya muda mfupi kulingana na mahitaji na kwamba kwa mwaka huu chuo hicho kimeweza kutoa wahitimu wa kozi za muda mfupi 10,300.

Naye mwakilishi wa waajiri kutoka kampuni ya PLASCO Fidelis Mashauri alisema waajiri wamejenga imani kubwa kwa vijana wanaotoka katika vyuo vya VETA kwa kuwa wanaonekana  wamepikwa vyema na kuwa mahiri katika fani zao.

 Mkurugenzi Mtendaji wa Taasisi ya Mwalimu Nyerere, Joseph Butiku akizungumza katika mahafali ya 48 ya Mafunzo ya Ufundi Stadi Daraja la Pili ya Chuo VETA Chang’ombe jijini Dar es Salaam.

 Mkurugenzi Mkuu wa VETA Dkt Pancras Bujulu akizungumza kuhusiana na mpipango ya VETA katika kutoa ujuzi bobezi katika kupunguza uhaba mafundi katika mahafali ya 48 ya Mafunzo ya Ufundi Stadi Daraja la Pili ya Chuo VETA Chang’ombe jijini Dar es Salaam. 

 Mwakilishi wa waajiri kutoka kampuni ya PLASCO Fidelis Mashauri akitoa maelezo ya mchango wa VETA katika mahafali ya 48 ya Mafunzo ya Ufundi Stadi Daraja la Pili ya Chuo VETA Chang’ombe jijini Dar es Salaam.

 Kaimu Mkuu wa Chuo cha VETA Dar es Salaam Violeth Fumbo akitoa taarifa katika katika mahafali ya 48 ya Mafunzo ya Ufundi Stadi Daraja la Pili ya Chuo VETA Chang’ombe jijini Dar es Salaam.

Wahitimu wakionyesha umahiri wao katika  katika mahafali ya 48 ya Mafunzo ya Ufundi Stadi Daraja la Pili ya Chuo VETA Chang’ombe jijini Dar es Salaam.

Share.

About Author

Leave A Reply